Kuba AQSHning 60 yillik sanksiyalaridan qancha zarar ko‘rgani hisoblandi
Vashington ushbu davlat iqtisodiyotiga 1962 yilda embargo joriy etgan.
Kuba 1962 yildan buyon AQSH sanksiyalari tufayli 154 milliard dollar zarar ko‘rdi. Bu haqda mamlakat tashqi ishlar vaziri Bruno Rodriges Parrilya maʼlum qildi.
“So‘nggi oltmish yilda umumiy zarar hozirgi hisob-kitoblarga asosan 154.2 milliard dollarni tashkil etadi. Qamal Tramp prezidentligi davrida misli ko‘rilmagan darajada kuchaytirildi. Hozirgi kunda prezident Jozef Bayden hukumatining Kubaga nisbatan siyosati ham, afsuski, respublikachilarnikidan farq qilmaydi. Hech qanday o‘zgarish bo‘lmadi”, – degan vazir.
Diplomatning qo‘shimcha qilishicha, Bayden administratsiyasi boshqaruvining dastlabki 14 oyida iqtisodiy qamal tufayli 6.364 milliard dollar zarar ko‘rildi.
Vashington Kuba bilan 1961 yilda diplomatik aloqalarni uzgan. Bunga Amerika mulklarining milliylashtirilishi sabab bo‘lgan. 1962 yil 3 oktyabrda esa AQSH ushbu davlatga qarshi savdo-iqtisodiy embargo joriy etgan. Ushbu sanksiyalarning bekor qilinishi Kuba tashqi siyosatining ustuvor yo‘nalishlaridan biri sanaladi.
