Sirdaryoda harbiy xizmatchilar janjallashdi
Holat yuzasidan vazirlik izoh berdi.
Ijtimoiy tarmoqlarda tadbirkor ayolning harbiy qismda shartnoma asosida ochgan tikuv syexi yopilganligi hamda ofiserlar tarkibiga mansub harbiy xizmatchilar o’rtasida kelishmovchilik yuz bergani tasvirlangan video tarqaldi. Holat yuzasidan Mudofaa vazirligi rasmiy munosabat bildirdi.
Ma’lum qilinishicha, Sirdaryo viloyatida joylashgan harbiy qism infratuzilmasi o’zgartirilishi sababli fuqaro N.A. Xodjimuratovaga harbiy qism hududida tadbirkorlik faoliyati bilan shug‘ullanishi uchun ijara shartnomasiga asosan ajratilgan joy (tikuv syexi) o’rniga harbiy qism hududidan boshqa joy taqdim etilgan hamda tadbirkorning norozi bo’lib bergan da’vo arizasi sud tomonidan rad etilgan.
Keltirilgan videotasvirda mansabi katta ofitser boshqa bir ofitserga tegishli buyruq talablarini buzishga qaratilgan harakatlari uchun tanbeh berganligi aks etgan.
Holat yuzasidan Qurolli Kuchlar Intizom nizomi va Qurolli Kuchlar Ichki xizmat nizomining tegishli bandlariga asosan videotasvirlardagi harbiy xizmatchilarga intizom choralari ko’rilgan.
