Surxondaryoda YPX xodimi kaltaklandi
Holat yuzasidan YHXB ma’lumot berdi
Ijtimoiy tarmoqlarda Surxondaryo viloyatining Boysun tumanida Yo‘l harakati xavfsizligi inspektori fuqaro tomonidan kaltaklangani haqida xabarlar tarqaldi. Holat yuzasidan viloyat IIB YHXB ma’lumot berdi.
Qayd etilishicha, 15-oktyabr kuni soat 11:50 larda Boysun tumani “Tuzbozor” mahallasi hududida xizmat olib borayotgan inspektor I. Pardayev tomonidan Neksiya rusumli avtomashina haydovchisi nazorat tariqasida to‘xtatilgan. Uning shaxsi planshet maxsus moslamasi orqali tekshirilganida, fuqaro M.A.ga nisbatan qidiruv e’lon qilinganligi aniqlanangan.
YPX inspektori haydovchini qidiruvda ekanligini, o‘zi bilan tuman IIBga borishi kerakligini aytadi. Fuqaro qonuniy talabga bo‘ysunmay, inspektorga faol qarshilik ko‘rsatib, urib tan jarohati yetkazadi.
Inspektorning qo‘lidan o‘ziga tegishli xujjatlarini olib, voqea joyidan ketishga uringan vaqtida shu yaqin atrofda xizmatga jalb etilgan IIO xodimlari yetib kelib, fuqaro Boysun tumani IIBga olib borilgan.
Sud tibbiy ekspertizasining dastlabki ma’lumotlarida inspektorda yengil tan jarohati mavjudligi ko‘rsatilib, holat yuzasidan Boysun tumani Prokuraturasi tomonidan fuqaro M.A.ga nisbatan Jinoyat kodeksining 219-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
