NYT: Isroil Ukraina bilan muhim razvedka maʼlumotlarini bo‘lishgan
Tel-Aviv Кiyevga gumanitar yordam yetkazib turishga vaʼda bergan.
Isroil Ukrainaga Eron tomonidan Rossiyaga yetkazib berilgan dronlarga qarshi kurashish uchun zarur bo‘lgan razvedka maʼlumotlarini taqdim etdi. Bu haqda "The New York Times" xabar berdi.
O‘tgan seshanba kuni Ukraina tashqi ishlar vaziri Dmitriy Kuleba Isroil hukumatiga Kiyevni havo hujumidan mudofaa tizimlari bilan zudlik bilan taʼminlashni so‘rab rasmiy nota yuborishini maʼlum qilgan edi. Ertasi kuni Isroil mudofaa vaziri Beni Gants Isroil NATO davlatlari bilan birgalikda Ukrainani qo‘llab-quvvatlashini, ammo “operativ sabablarga ko‘ra” hali ham Kiyevni qurol-yarog‘ bilan taʼminlash niyatida emasligini aytdi.
Yevropa Ittifoqiga aʼzo davlatlar elchilari bilan uchrashuvda nutq so‘zlagan vazir Isroil Kiyevga insonparvarlik yordami va noharbiy texnika yetkazib berishda davom etishini taʼkidladi.
Avvalroq Rossiya va Eron rasmiylari bir qator G‘arb OAVlarining Ukrainada foydalanish uchun Rossiyaga Eron dronlari yetkazib berilishi haqidagi daʼvolarini rad etgan edi. RF Prezidentining matbuot kotibi Dmitriy Peskov armiya mahalliy ishlab chiqarilgan uchuvchisiz uchoqlardan foydalanishini taʼkidladi.
