Samarqand yana bir muhim xalqaro tadbirga mezbonlik qiladi
U 27-28 oktyabr kunlari bo‘lib o‘tadi.
MDHga aʼzo davlatlarning Parlamentlararo Assambleyasining kuzgi sessiyasi tadbirlari Samarqandda o‘tkaziladi. Bu haqda Parlamentlararo Assambleya kengashi matbuot xizmati xabar berdi.
“MDH Parlamentlararo Assambleya sessiyasi ilk bor O‘zbekistonda o‘tkaziladi. Tadbirda Parlamentlararo Assambleyaga aʼzo davlatlar parlamenti rahbarlari va aʼzolari, shuningdek, xalqaro tashkilotlar, olimlar va ekspertlar ishtirok etadi”, — deyiladi xabarda.
Tadbirlar 27-28 oktyabr kunlari o‘tkaziladi. Jumladan, 27 oktyabrda Assambleyaning madaniyat, axborot, turizm va sport, agrar siyosat, tabiiy resurslar va ekologiya, siyosiy masalalar va xalqaro hamkorlik bo‘yicha komissiyalar yig‘ilishi bo‘lib o‘tadi. Shuningdek, shu kuni MDH Yoshlar parlamentlari aʼzolari ham uchrashadi.
Parlamentlararo Assambleyaning 54-yalpi majlisi esa 28 oktyabrda bo‘ladi.
