Isroil Ukrainaga qurol bermasligi sababini ochiqladi
Mamlakat Prezidenti bu bo‘yicha maʼlumot berdi.
Ukrainaga Isroil qurollarini yetkazib berish bo‘yicha ko‘plab cheklovlar bor. Bu haqda Isroil prezidenti Isxak Gersog maʼlum qildi.
“Ayrim qurollarimizning eksport variantlari yo‘q. Ayrim tizimlarimiz dushman qo‘liga tushmasligi kerak. Baʼzi sirlarni hech kimga bera olmaymiz. Ammo qayerda imkoni bo‘lsa, biz yordam beryapmiz”, – degan u CNN telekanaliga bergan intervyusida.
Bundan tashqari, Prezident qurol yetkazib bermayotgani uchun Isroilga yog‘ilayotgan tanqidlarni inkor qildi. Gersog AQSH va Yevropaning Kiyevga ayrim qurollarni berishdan bosh tortganini eslatgan.
Shu bilan birga Isroil rahbari Ukrainada Eron dronlari qo‘llanilishi bilan bog‘liq vaziyatni diqqat bilan tahlil qilinayotganini taʼkidlagan. Vladimir Zelenskiyning maʼlumotlariga ko‘ra, harbiy mojaro boshlangandan buyon Moskva Eronda ishlab chiqarilgan 400 drondan foydalangan.
Avvalroq Isroil Ukrainaga muhim razvedka maʼlumotlarini bergani to‘g‘risida xabar qilingandi.
