Anqara yarim million suriyalikning vataniga qaytganini aytmoqda
Erdog‘an Suriya shimolida Turkiya harbiy amaliyoti tufayli tinchlik o‘rnatilganini iddao qildi.
Suriya shimolidagi xavfsizlik zonalariga 500 mingdan ortiq kishi ixtiyoriy ko‘chib ketdi. Bu haqda Rajab Toyyib Erdog‘an maʼlum qildi.
“Biz 530 ming odamning Suriyada yaratilgan xavfsizlik zonasiga ixtiyoriy qaytishini taʼminladik”, – degan Turkiya rahbari.
Uning so‘zlariga ko‘ra, Anqaraning Suriyadagi harbiy operatsiyalari chegara yaqinida shakllangan terrorchilar koridorining yo‘q qilinishiga sabab bo‘lgan.
Suriyada fuqarolar urushi boshlangach, bu yerdagi qochqinlarning katta qismi Turkiya hududiga kirib keldi. So‘nggi yillarda Anqara qo‘shni davlatning o‘ziga chegaradosh hududlarida bir qancha harbiy amaliyotlar o‘tkazdi va bu hududlarda fuqarolik infratuzilmalarini yaratdi. Ayrim kuzatuvchilar bu orqali turk hukumati qochqinlarning vataniga qaytishini taʼminlamoqchi.
