Bugun O‘zbekistonda kuchli yomg‘ir yog‘adi
Harorat 10 darajagacha pasayishi kutilmoqda.
“O‘zgidromet” 30–31-oktyabr kunlari respublikada kuzatiladigan ob-havo prognozini ma’lum qildi.
Unga ko‘ra, shanba va yakshanba kunlari O‘zbekiston hududiga Volga bo‘yi hududlaridan nam va sovuq havo massalari kirib keladi.
30-oktyabrda respublika hududi, 31-oktyabrda Farg‘ona vodiysi viloyatlari bo‘yicha yomg‘ir yog‘adi, ba’zi joylarda kuchli bo‘ladi. Tog‘li hududlarda 30-31-oktyabrda yog‘ingarchilik (yomg‘ir, qor), vaqti-vaqti bilan kuchli bo‘ladi.
30-31-oktyabrda Qoraqalpog‘iston Respublikasi, Xorazm, Buxoro, Navoiy, Surxondaryo, Farg‘ona viloyatlarida ba’zi joylarda shamol 15-20 metr/sekundgacha kuchayishi, ayrim joylarda chang-to‘zonlar kuzatilishi kutilmoqda.
Kunduzi havo harorati 10-13 daraja iliqqacha pasayadi.
