Sanatoriylarga yo‘llanma olish bo‘yicha elektron navbat joriy qilindi
Foydalanuvchilar DXM yoki YAIDXP orqali bu imkoniyatdan foydalanish mumkin.
Keksalar va nogironligi bo‘lgan shaxslarga sanatoriylarda davolanish uchun yo‘llanma berish bo‘yicha elektron navbat joriy etildi. Bu haqda “O‘zA” axborot agentligi xabar qilmoqda.
Qayd etilishicha, O‘zbekiston Respublikasi Tibbiy-ijtimoiy xizmatlarni rivojlantirish agentligi tizimidagi keksalar, nogironligi bo‘lgan shaxslar, urush va mehnat faxriylari uchun sanatoriylarga yo‘llanmalar Urush nogironlariga va qatnashchilariga tenglashtirilgan shaxslarga, halok bo‘lgan harbiy xizmatchilarning yangi nikohdan o‘tmagan beva xotinlari (beva erlari)ga beriladi.
Shuningdek, respublika ahamiyatiga molik shaxsiy pensiya oluvchi shaxslar, Chernobil AYeS halokati oqibatida nurlanish kasalligiga chalingan va uni boshidan kechirgan shaxslar, shuningdek, Chernobil halokati sababli nogiron bo‘lib qolgan shaxslar, Yadro poligonlari va boshqa radiasiya-yadro ob’ektlarida harbiy xizmatni o‘tagan pensiya yoshidagi shaxslar ham mazkur imkoniyatdan foydalanishlari mumkin.
1- va 2-guruh nogironligi bo‘lgan shaxslar, ko‘zi ojiz 1-guruh nogironini kuzatib boruvchi shaxslarga, o‘zgalar parvarishiga muhtoj bo‘lgan yolg‘iz keksalarga va yoshga doir pensiya oluvchilarga ham sanatoriylarda davolanish uchun yo‘llanmalar beriladi.
Yo‘llanmalarni berish davriyligi (birlamchi murojaat etganlar bundan mustasno) har yili – navbat asosida iborat bo‘ladi.
Foydalanuvchilar Davlat xizmatlari markazlari yoki Yagona interaktiv davlat xizmatlari portali orqali (YAIDXP) bu imkoniyatdan foydalanish mumkin. Elektron tizim orqali yo‘llanmalar rasmiylashtirilgandan keyin Davlat xizmatlari markazlariga keksalar va nogironligi bo‘lgan shaxslarning o‘zlari yoki vakillari kelib, yo‘llanmalarning elektron yoki qog‘oz shaklidagi nusxalarini olishi ham mumkin.
Ta’kidlanishicha, bugungi kunda Tibbiy-ijtimoiy xizmatlarni rivojlantirish agentligi tizimida 11 ta sanatoriy mavjud bo‘lib, ularning bir yillik sog‘lomlashtirish quvvati 45 ming nafar fuqaroni tashkil qiladi. 2024-yilga qadar esa yana har biri 100 o‘ringa mo‘ljallangan 4 ta sanatoriy qurish ko‘zda tutilgan.
Toshkent shahrida navbatga olingan fuqarolar uchun “Nuroniylar” sanatoriysi, “Tovoqsoy” sanatoriysi, “Marjon suvi” sanatoriysi, “Oltiariq” sanatoriysi va “Kosonsoy” sanatoriysi kabi 5 ta sanatoriy xizmat ko‘rsatadi.
