Toshkent viloyatida 19 yoshli yigit do‘pposlanib, ustiga “zelyonka” sepib yuborildi
Hozirda holat yuzasidan jinoyat ishi qo‘zg‘atilgan.
Ijtimoiy tarmoqlarda noma’lum shaxslar fuqaroni urayotgani aks etgan video tarqaldi. Holat yuzasidan viloyat IIBB rasmiy ma’lumot berdi.
Ma’lum bo‘lishicha, joriy yilning 12 oktyabr kuni soat 21:00 larda 2003 yilda tug‘ilgan J.R., 2001 yilda tug‘ilgan Sh.A. va 2005 yyilda tug‘ilgan R.A.lar, telegram-bot orqali giyohvandlik moddalarni tarqatish bilan shug‘ullangan 2003 yilda tug‘ilgan A.B. bilan Mirobod tumanida uchrashuv belgilashgan. Shundan so‘ng uni Bo‘stonliq tumaniga olib borib, urib tan jarohati yetkazishgan va ustiga “zelyonka” sepishgan.
Mazkur holat yuzasidan Mirobod tumani IIO FMB tergov bo‘limi tomonidan Jinoyat kodeksining 137-moddasi 2-qismi (Odam o‘g‘irlash) va 105-moddasi 2-qismi (Qasddan badanga o‘rtacha og‘ir shikast yetkazish) bilan jinoyat ishi qo‘zg‘atilgan. Ularga nisbatan qamoqqa olish ehtiyot chorasi qo‘llangan.
Tergov jarayonida J.R., Sh.A. va R.A.lar shunga o‘xshash boshqa bir qancha jinoyatlarni sodir etishga aloqadorligi aniqlangan. Tergov davom etmoqda.
