Andijonda soxta hujjat bilan 10 mlrd “uxlatildi”
Hozirda holat bo‘yicha jinoyat ishi ochilgan.
Soxta hujjatlar orqali 10 mlrd so‘m kreditni qo‘lga kiritgan MCHJ rahbari aniqlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning Andijon viloyat boshqarmasi tomonidan tergovga qadar tekshiruv o‘tkazilgan. Unda “Sh.” MCHJni norasmiy boshqarib kelgan Sh.J. va boshqalar hududiy tijorat banki filialiga soxta baholash hujjatlarini taqdim qilish orqali naslli qora mollarni xarid qilish uchun ajratilgan 10 mlrd so‘m kredit mablag‘ini aldov yo‘li bilan qo‘lga kiritganliklari aniqlangan.
Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
