Andijondagi baliqxonada fohishaxona aniqlandi
Reyd tadbirlarida 19 yoshli ayol qo‘lga tushgan.
Andijon viloyati Ulug‘nor tumanida baliqxona ichida fohishaxona tashkil etganlar qo‘lga olindi. Bu haqda “O‘zbekiston 24” telekanalining “Vaziyat 24” ko‘rsatuvida xabar qilindi.
Ma’lum bo‘lishicha, viloyat Ichki ishlar boshqarmasi odam savdosi va noqonuniy migrasiyaga qarshi kurashish bo‘limi hamda Ulug‘nor tumani ichki ishlar bo‘limi xodimlari tomonidan tezkor tadbir o‘tkazilgan. Tadbir davomida tumandagi umumiy ovqatlanish shoxobchasi niqobi ostida qo‘shmachilik faoliyati bilan shug‘illanib kelayotganlar aniqlangan.
Tuman hududidagi baliqxonada ish yurituvchi bo‘lib ishlab kelayotgan 44 yoshli ayol 19 yoshli ayolning 200 ming so‘m evaziga fohishalik bilan shug‘ullanishiga sharoit yaratib bergan vaqtida reyd tadbiri ishtirokchilari ashyoviy dalillar bilan qo‘lga olgan.
Mazkur holat yuzasidan tuman ichki ishlar bo‘limi huzuridagi tergov bo‘limi tomonidan Jinoyat kodeksining 131-moddasi (qo‘shmachilik qilish yoki fohishaxona saqlash) 1-qismi bilan jinoyat ishi qo‘zg‘atilib, tergov harakatlari olib borilayotgani ma’lum qilingan.
