Farg‘onada aholiga ajratilgan ko‘mir sotib yuborildi
Holat yuzasidan Jinoyat kodeksining 2 ta moddasi bila nish ochilgan.
Aholi uchun ajratilgan ko‘mir yoqilg‘isini o‘zlashtirgan shaxslar aniqlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, departamentning Oltiariq tuman bo‘limi tomonidan o‘tkazilgan tergovga qadar tekshiruvda “K.t.” MCHJ Farg‘ona viloyati filiali So‘x ko‘mir ombori mudiri U.A. va boshqalar tumandagi 7 ta MFY uchun ajratilgan ko‘mirni go‘yoki aholiga yetkazib berilganligi haqida soxta hujjatlarni rasmiylashtirishib, jami 300,5 tonna ko‘mirni boshqa shaxslarga bozor narxida sotib yuborganliklari aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
