Samarqanddagi omborxonada yong‘in chiqdi
Holat bo‘yicha vazirlik ma’lumot berdi.
Bugun, 2-noyabr kuni Samarqand shahridagi omborxonalardan birida yong‘in chiqdi. Holat yuzasidan Favqulodda vaziyatlar vazirligi Matbuot xizmati rasmiy ma’lumot berdi.
Qayd etilishicha, soat 17:11 da Samarqand shahri “A.Navoiy” MFY Shohruh ko‘chada joylashgan omborxonada yong‘in sodir bo‘layotganligi to‘g‘risida viloyat FVBga xabar kelib tushgan. Shunga ko‘ra, 5 ta yong‘in-qutqaruv ekipaji soat 17:18 da voqea joyiga yetib borib, yong‘in soat 17:29 da qurshab olingan va soat 18:40 bartaraf etilgan.
Hodisa oqibatida tan jarohati olgan va halok bo‘lganlar yo‘q. Binoning garaj hududidagi yonilg‘i saqlash xonasining 20 kvadrat metr maydoni va yonilg‘i tashishga mo‘ljallangan (benzavoz) “GAZ-52” avtomobili yonib zararlangan.
Hozirda yong‘inning kelib chiqish sababi va moddiy zarar miqdori aniqlanmoqda.
