Toshkentda YPX xodimlari qoidabuzar haydovchining avtomashina oynalarini sindirishdi
Holat yuzasidan shahar IIBB rasmiy izoh berdi.
Ijtimoiy tarmoqlarda YPX inspektorlari Neksiya–2 rusumli transport vositasini to‘xtatishga urinayotgani aks etgan video tarqaldi. Holat yuzasidan shahar IIBB rasmiy munosabat bildirdi.
Qayd etilishicha, 1-noyabr kuni soat 17.00 larda 2004 yilda tug‘ilgan A.X. Neksiya–2 rusumli avtomashinani “pravasiz” holda boshqarayotgan vaqtida yo‘lda uch marotaba YPX inspektorlarining qonuniy talablariga bo‘ysunmasdan harakatni davom ettirgan.
To‘rtinchi marotaba Yunusobod tumani Amir Temur va “Shahrisabz” ko‘chalari kesishgan chorrahasida YPX inspektori M.Turdiyev tomonidan jezl va xushtak yordamida to‘xtash ishorasi berilganda haydovchi katta tezlikda harakatni davom ettirgan. Bir nechta xodimlarning qonuniy talablariga bo‘ysunmasdan harakatini davom ettirayotgan ushbu avtomobil harakatini cheklash maqsadida boshqa transport vositalari to‘xtatilgan. So‘ng Amir Temur – Alisher Navoiy – Shaxrisabz ko‘chalari kesishgan chorraxada YPX inspektori D.Ganiyev tomonidan transport vositasi to‘xtatib qolingan. Haydovchi o‘zini shubhali tutganligi, xodimlarning eshikni ochish va transport vositasidan tushish haqidagi qonuniy talabiga bo‘ysunmasdan, transport vositasini ichkaridan qulflab olganligi sababli transport vositasining oynasini sindirish orqali haydovchining eshigi ochilgan va haydovchining transport vositasini boshqarish imkoniyati cheklangan.
Mazkur holat yuzasidan haydovchi Akbar X.ga nisbatan O‘zbekiston Respublikasi Ma’muriy javobgarlik to‘g‘risidagi kodeksning 194-moddasi (“Ichki ishlar organlari xodimining qonuniy talablarini bajarmaslik”) bilan ma’muriy bayonnoma rasmiylashtirilgan. Transport vositasi jarima maydoniga joylashtirilgan.
