11-noyabrdan Qoraqalpog‘istonda o‘quvchilarga bepul oziq-ovqat beriladi
Avvalroq 24-oktyabrdan boshlab nonushta tarqatilishi rejalashtirilgandi.
11-noyabrdan Qoraqalpog‘istonda maktab o‘quvchilarini bepul ovqat bilan ta’minlash boshlanadi. Bu haqda Respublika Xalq ta’limi vazirligi xabar qildi.
Qayd etilishicha, 2022/2023 o‘quv yilida Qoraqalpog‘iston Respublikasidagi 716 ta ta’lim muassasalarida 143 577 nafar boshlang‘ich sinf o‘quvchilari keytering tashkilotlari tomonidan bepul oziq-ovqat bilan ta’minlanishi belgilangan.
Qoraqalpog‘iston Respublikasida mavjud 716 ta umumta’lim maktablari hududlar kesimida 64 ta lotlarga joylashtirilgan.
Umumta’lim maktablarining boshlang‘ich sinf o‘quvchilarini bepul keytering usulida ovqatlantirish maqsadida, keytering tashkilotini tanlab olish bo‘yicha O‘zbekiston Respublikasi “Davlat xaridlari to‘g‘risida”gi Qonuni talablariga muvofiq xarid qilish tartib-taomillari asosida tanlov o‘tkazish uchun ommaviy axborot vositalari orqali e’lonlar berilgan.
Platformaga joylashtirilgan 64 ta lotlardan 41 ta lot 11 ta tadbirkorlik sub’yektlari tomonidan yutib olinib, shartnomalar rasmiylashtirilgan. Hozirda 716 ta umumta’lim maktablaridan 481 ta maktabda boshlang‘ich sinf o‘quvchilari bepul ovqat bilan ta’minlanmoqda.
22 ta lotda baholash ishlari tugatilib, bayonnomalar rasmiylashtirilib, 24 oktyabr kunidan boshlab nonushta tarqatilishi rejalashtirilgan edi. Lekin O‘zbekiston Respublikasi Korrupsiyaga qarshi kurashish agentligining taqdimnomasiga asosan O‘zbekiston Respublikasi Vazirlar Mahkamasining 2022 yil 20 maydagi 276-son qarori bilan tasdiqlangan “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risidagi”gi Nizomning buzilishi bo‘yicha o‘tkazilgan 22 ta lot tanlovi ishchi guruh komissiyasi tomonidan bekor qilingan va bundan tashqari, tadbirkorlik sub’yekti tomonidan 1 ta lot bekor qilinib, jami 23 ta lot tanlov (tender)ga qayta joylashtirilgan.
Joriy yil 11 noyabr kuni o‘qish boshlanishi bilan barcha maktablarning boshlang‘ich sinf o‘quvchilarini bepul tayyor oziq-ovqatlar bilan ta’minlash rejalashtirilgan.
