Ekspert: Ukrainani muzokaralar stoliga olib borish shart
Bunga majbur qilayotgan omillar ochiqlandi.
Rossiya-NATO nizosi avj olib ketmasidan AQSH Ukrainani tezroq muzokaralar stoliga olib borishi kerak. Bu haqda Jorjtaun universiteti professori Charlz Kupchanning The New York Times gazetasida eʼlon qilingan maqolasida so‘z boradi.
Muallifning fikricha, Jozef Bayden administratsiyasi Ukrainani qo‘llab-quvvatlashni strategik ustuvor vazifa deb atab to‘g‘ri yo‘l tutgan. Bu nizoga to‘g‘ridan-to‘g‘ri aralashishdan qochishga imkon beradi.
"Shu bilan birga, AQSHning o‘z manfaatlariga javob beradigan darajadagi ishtirokini saqlab qolish tobora qiyinlashmoqda. NATO va Rossiya o‘rtasida to‘g‘ridan-to‘g‘ri to‘qnashuvning oldini olish maqsadida Vashington uchun Kiyev harbiy rejalari yana-da aniq bo‘lishi, AQSH amaldorlari esa Ukraina qanday jang olib borayotgani haqida ko‘proq maʼlumotga ega bo‘lishi kerak. AQSH Ukrainaning operativ rejalashtirishida qatnashishi kerak", — degan Kupchan.
Uning qo‘shimcha qilishicha, NATO va Rossiya o‘rtasida keng qamrovli nizo boshlanib ketishi xavfi kundan-kunga ortmoqda. Shu sababli ekspert Vashington va uning ittifoqchilarini nizoni boshqarishda ishtirok etishga va uning diplomatik yakunlanishini taʼminlashga chaqirgan.
