Ikkita viloyatda “perevod” bilan bog‘liq firibgarlik fosh bo‘ldi
Bu bo‘yicha hududlarda tergovga qadar tadbirlar o‘tkazilgan.
O‘qishni ko‘chirib berish hamda o‘qishga kiritib qo‘yish bilan bog‘liq firibgarlik holatlari fosh etildi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashi departamenti.
Qayd etilishicha, departamentning Yangiqo‘rg‘on tuman bo‘limi tomonidan tergovga qadar tekshiruv o‘tkazilgan. Unda fuqaro D.Yu. fuqaro I.K.ning qo‘shni Qirg‘iziston Respublikasi universitetidagi o‘qishini tanishlari orqali O‘zbekistondagi oliy ta’lim muassasalaridan biriga ko‘chirib berishini aytib, aldov yo‘li bilan 3 000 AQSH dollarini olganligi aniqlangan.
Olot tumanida o‘tkazilgan tergovga qadar tekshiruvda fuqaro M.T. fuqaro N.A.ning qizini tanishlari orqali qo‘shni Qozog‘iston Respublikasidagi oliy ta’lim muassasasiga o‘qishga kiritib qo‘yish evaziga 1 250 AQSH dollarini hamda fuqaro A.B.ni Qozog‘iston Respublikasi universitetidagi o‘qishini O‘zbekistondagi oliy ta’lim muassasalaridan biriga ko‘chirib berishini aytib, 2 000 AQSH dollarini firibgarlik yo‘li bilan qo‘lga kiritganlini aniqlangan.
Dang‘ara tumanida IIB xodimlari bilan hamkorlikda o‘tkazilgan tezkor tadbirda esa fuqaro M.T. fuqaro Z.A.ning ishonchiga kirib, go‘yoki yuqori lavozimda ishlovchi tanishlari yordamida Qo‘qon tibbiyot kollejiga o‘qishga kiritib qo‘yishi evaziga 500 AQSH dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
