Andijonda hokimning qarori soxta bo‘lib chiqdi
Mazkur hujjat bilan maktab yeri qurilishga berib yuborilgan.
Ijtimoiy tarmoqlarda Andijon shahridagi 50-maktab stadioni sotib yuborilgani haqida xabarlar tarqaldi. Holat yuzasidan viloyat prokuraturasi rasmiy bayonot berdi.
Ma’lum bo‘lishicha, Andijon shahar hokimining 2019-yil 14-avgustdagi qarori bilan 50-maktab maydoni hokimlik zahirasiga olinib, shahar hokimining 2020-yil 2-iyun kungi qaroriga asosan “SXF Andijon city stroy” MCHJga kompleks bino inshootlari qurish uchun ajratib berilgan.
O‘rganish davomida 2020-yil 2-iyun kungi qaror soxtalashtirilganligi aniqlanib, Andijon shahar prokuraturasi tomonidan 2022-yil 5-oktyabr kuni Jinoyat kodeksining 228-moddasi 2-qismi “b” bandi bilan jinoyat ishi qo‘zg‘atilgan.
Dastlabki tergov harakatlari Andijon shahar IIO FMB huzuridagi TB tomonidan olib borilmoqda.
Bundan tashqari, shahar hokimining 2019-yil 14-avgust kungi qarori qonun talablariga zid ravishda qabul qilinganligi sababli qarorni haqiqiy emas deb topish haqida Andijon tumanlararo ma’muriy sudiga da’vo arizasi kiritilishi ta’minlangan.
