Sunak Rossiya taʼsirini pasaytirish uchun besh tashabbusni ilgari surdi
Britaniya Bosh vaziri bu bo‘yicha maxsus maqola yozdi.
Buyuk Britaniya Bosh vaziri Rishi Sunak Rossiyani “quvg‘indi davlat” deb atadi va uning dunyo iqtisodiyotidagi taʼsirini kamaytirishni taklif qildi. Bu haqda uning The Telegraph gazetasida chop etilgan maqolasida so‘z boradi.
Janob Sunakning rejasi besh punktdan iborat:
Birinchidan, kelayotgan qishda yordamga eng muhtoj davlatlarni qo‘llab-quvvatlash. Bosh vazirning so‘zlariga ko‘ra, Buyuk Britaniya Ukrainaga yordam berishni, o‘z fuqarolariga elektr energiyasi uchun hisobni kamaytirishni va dunyoda ochlikni oldini olishdagi saʼy harakatlarini davom ettiradi;
Ikkinchidan, imkoniyati bor davlatlar ko‘proq oziq-ovqat zaxiralarini boshqalar bilan bo‘lishishi kerak. Rishi Sunak Rossiyani oziq-ovqatdan qurol sifatida foydalanishda ayblagan va BMTning g‘alla kelishuvini muddatini uzaytirish tashabbusini qo‘llab-quvvatlagan;
Uchinchidan, yetkazib berish zanjirlari xavfsizligi kuchaytirish va Rossiya kabi davlatlarga energetik qaramlikdan qutulish ;
To‘rtinchidan, erkin bozorlar va ochiq global iqtisodiyot tamoyillariga sodiq qolish;
Beshinchidan, qaysi davlatlar rivojlanayotgan mamlakatga “kredit tuzoqlari” qo‘yayotganini aniqlash (“Kredit tuzoqlari” — kreditor davlatning qarz olayotgan davlatga qarz miqdorini oshirish orqali o‘z taʼsirini kuchaytirish). Bundan tashqari, inflyatsiya o‘sishi sabablarini oldini olish taklif qilingan.
Sunak ushbu maqolani G20 sammiti arafasida yozgan.
