Allergik kasalliklardan butkul xalos bo‘lish mumkinmi?
Bu bo‘yicha mutaxassis ma'lumot berdi.
Hozir allergik kasalliklar avj olgan davrda yashayapmiz. Bir tomondan sayyoramizdagi ekologik inqiroz, boshqa tomondan immunitetning zaiflashuvi bunday holatlarning bosh sababchisi.
Shu bois mutlaqo zararsizdek ko‘ringan o‘simliklar changi, jonivorlar yungi, oziq-ovqat mahsulotlari, dori-darmonlar ham ba’zi insonlarda kuchli allergik reaksiyalarni qo‘zg‘atishga qodir.
Xo‘sh, o‘zi bu dardning samarali davosi bormi? Allergik kasalliklardan butkul xalos bo‘lish mumkinmi?
“Sohamizda yangidan-yangi diagnostika va davolash usullari joriy etilmoqda. Shulardan biri allergen spesifik immunoterapiya (AIST) deb nomlanadi.
Ushbu muolaja turida allergenlarning tuzli-suvli eritmasi bemor organizmiga kichik dozalarda titrlab yuboriladi. Shundan so‘ng spesifik antitana miqdori kamayishi, ya’ni allergenga nisbatan javob reaksiyasi pasayishi kuzatiladi.
Natijada qondagi umumiy IgE miqdori ozayib, bloklovchi antitana — IgG4 ko‘payadi. Shu tariqa kasallik simptomlari kamayib, hatto xastalik bemorni umuman bezovta qilmaydi.
Mutaxassisning ta’kidlashicha, ASIT allergik rinit va bronxial astmaning yengil hamda o‘rta shakllaridan aziyat chekayotgan 5 yoshdan oshgan bolalar va kattalarni davolashga mo‘ljallangan. Biroq bu usul atopik dermatit, oziq-ovqat allergiyasi muolajasida samara bermaydi. Immunitetni o‘zgartirmaydi.
Davolash kursi — 3 yildan 5 yilgacha. Muolajalar ikki — in’yeksiya yoki sublingual usulda amalga oshiriladi. Ikkinchi shakl tabletka yoki tomizg‘i dorilarni o‘z ichiga oladi. Ammo har ikkisining samaradorligi bir xil.
Davolash jarayonini boshlash vaqti bemorning aynan nimaga allergiyasi borligi bilan bog‘liq. Masalan, daraxt gulchanglari xastalik qo‘zg‘atuvchisi bo‘lsa, kech kuz, qish mavsumi va may oyigacha bo‘lgan davr maqbul. In’yeksiya shaklida muolajani yil bo‘yi davom ettirsa bo‘ladi.
Uy changlariga allergiyasi bo‘lganlarni davolash ham kasallikning tinch davrida boshlanadi. Agar alomatlar mavjud bo‘lmasa, muolajalarni yil bo‘yi qo‘llash mumkin.
Ayni paytda Respublika ilmiy ixtisoslashtirilgan allergologiya markazida bemorlarni allergen spesifik immunoterapiya orqali davolash usuli keng yo‘lga qo‘yilgan”, — deydi Respublika ilmiy ixtisoslashtirilgan allergologiya markazi direktori, tibbiyot fanlari doktori, professor Ilmira Razikova.
