Shavkat Mirziyoyev AQSHning yirik kompaniyalari rahbarlari bilan uchrashdi
2023-yilning birinchi choragida ikki mamlakat o‘rtasida qo‘shma biznes forumini o‘tkaziladi.
Bugun, 16-noyabr kuni Prezident Shavkat Mirziyoyev “Ko‘ksaroy” qarorgohida Xorijiy investorlar kengashining birinchi majlisida ishtirok etish uchun O‘zbekistongv kelgan Amerika-O‘zbekiston savdo palatasi raisi Kerolin Lemm boshchiligidagi delegatsiya bilan uchrashuv o‘tkazdi.
Delegasiya tarkibida uchrashuvda AQSHning “General Electric”, “Procter and Gamble”, “Coca-Cola” “CNH Industrial”, «John Deere”, “Zeppelin” va “Silverleafe” kompaniyalari rahbarlari ishtirok etdi.
Davlat rahbari mehmonlarni qutlar ekan, O‘zbekiston va AQSH o‘rtasidagi ko‘p qirrali hamkorlik jadal rivojlanib borayotganini alohida ta’kidladi.
Tarkibiga 38 ta yetakchi kompaniya kiruvchi Amerika-O‘zbekiston savdo palatasi ikki tomonlama strategik sheriklikni mustahkamlashga salmoqli hissa qo‘shayotgani qayd etildi.
Mamlakatlar korxonalari o‘rtasidagi amaliy hamkorlikni kengaytirish va qo‘shma kooperasiya loyihalarini ilgari surish yuzasidan fikr almashildi.
Energetika, kimyo tarmog‘i, mashinasozlik, oziq-ovqat va to‘qimachilik sanoati, qishloq xo‘jaligi va sog‘liqni saqlash sohalari hamkorlikning ustuvor yo‘nalishlari sifatida qayd etildi.
Kerolin Lemm palata a’zolarining O‘zbekistondagi faoliyati har tomonlama qo‘llab-quvvatlanayotgani uchun AQSH ishbilarmonlar hamjamiyati nomidan davlat rahbariga tashakkur bildirdi.
Amerika ishbilarmon doiralari vakillari AQSH biznesining o‘zaro hamkorlikni yanada chuqurlashtirishga qiziqishi ortib borayotganini alohida ta’kidladi. O‘zbekiston yetakchisi rahbarligida amalga oshirilayotgan islohotlarning muvaffaqiyatlarini yuqori baholab, mamlakat bilan investisiyaviy sheriklikni kengaytirish uchun ochilayotgan imkoniyatlardan faol foydalanishga intilishini tasdiqladi.
Yangi qo‘shma loyihalarni ishlab chiqish uchun 2023 yilning birinchi choragida qo‘shma biznes forumini o‘tkazishga kelishib olindi.
