Hamkasbiga tanbeh bergan Xitoy rahbari, sammitni erta tark etgan Lavrov va tarixiy uchrashuvlar
G20 sammitining eng yorqin voqealari.
So‘nggi kunlarda butun dunyo e’tibori Indoneziyaning Bali oroliga qaratildi. Jahon yetakchilarini bir joyga jamlagan G20 sammiti kutilmagan voqealar, intrigalar va avvaldan ma’lum qilinmagan uchrashuvlar bilan avvalgilaridan farq qildi deyish mumkin.
Sammitning birinchi kunida Ukraina mojarosi markaziy mavzulardan biri bo‘ldi. Vladimir Putin va Vladimir Zelenskiy Baliga kelmagan bo‘lsa-da, mintaqadagi vaziyat masalasi tadbirning deyarli barcha ishtirokchilari tomonidan ko‘tarilgan.
G20’ning eng esda qolarli voqealardan biri AQSH prezidenti Jo Bayden va Xitoy yetakchisi Si Szinpin o‘rtasidagi muzokaralar bo‘ldi. Ikki davlat rahbarlarining tarixda birinchi marta bo‘lib o‘tgan suhbati Oq uy tomonidan ikki davlat pozisiyalarini yaqinlashtirish yo‘lidagi muhim qadam sifatida bir necha bor ta’kidlandi. AQSH va Xitoy rahbarlari uch soatdan ortiq suhbatlashdi.
Muzokaralar yakunida shov-shuvli bayonotlar bo‘lmadi, Bayden jurnalistlarning savollariga javob berar ekan, Ukraina mavzusiga to‘xtaldi. U Xersonning Ukraina Qurolli kuchlari tomonidan qaytarib olinishini “Kiyev uchun muhim g‘alaba” deb atadi. Shu bilan birga, u bu voqea qanday oqibatlarga olib kelishini aytishga qiynaldi, biroq Ukrainaga yordam ko‘rsatishni davom ettirishga va’da berdi.
Bundan tashqari, Bayden AQSH Ukraina ishtirokisiz Rossiya bilan muzokaralar olib borish niyatida emasligini yana bir bor ta’kidladi.
Si Szinpin, o‘z navbatida, Xitoy Rossiya-Ukraina muzokaralarini qayta boshlash tarafdori ekanini aytdi. U, shuningdek, AQSH va YeI mojaroni tezroq hal qilishga yordam berishiga umid bildirdi.
Shuningdek, AQSH prezidenti Jo Bayden turkiyalik hamkasbi Rajab Toyyib Erdog‘on sammit doirasida e’lon qilinmagan yana bir qisqa uchrashuv o‘tkazdi.
Qayd etilishicha, tomonlar Istanbuldagi terakt va Ukraina donini eksport qilish bo‘yicha xalqaro harakatlarni muhokama qilgan.
Bayden Istanbuldagi terakt munosabati bilan Prezident Erdo‘g‘on va Turkiya xalqiga “chuqur hamdardlik” bildirdi.
E’tiborli holatlardan biriXitoy rahbari jurnalistlar oldida Kanada bosh vaziriga “tanbeh” berganidir.
Xitoy raisi Jastin Tryudoni muzokaralarda samimiy emaslikda aybladi. Si Szinpin kanadalik hamkasbi bilan suhbatining OAVga chiqib ketganidan norozilik bildirdi.
Katta yigirmatalik mamlakatlarining aksariyati Ukrinadagi urushni qoralamoqda, ammo sammitda bu boradagi boshqacha fikrlar ham yangradi.G20 davlatlari mojaro dunyo iqtisodiyoti muammolarini chuqurlashtirib, yadro quroli qo‘llanilishi xavfini keltirib chiqarganini aytmoqda.
Sammitning so‘ngi kunida ishtirokchilar Rossiya agressiyasi tanqid ostiga olingan yakuniy bayonetmatni ustida ishlamoqchi edi, ammo Polsha hududiga qulagan raketa tufayli bu ish ortga surilgan. Rossiya TIV rahbari Sergey Lavrov esa Balini muddatidan avval tark etgan.
