Bloomberg: Buyuk Britaniya dunyodagi mavqeini yo‘qotmoqda
Xalqaro munosabatlar markazi Osiyoga ko‘chayotgani qayd etilgan.
Buyuk Britaniya iqtisodiy muammolar tufayli global miqyosida o‘z pozitsiyalarini boy bermoqda. Bu haqda tahlilchi Alan Kroufordning Bloomberg agentligida eʼlon qilgan maqolasida so‘z boradi.
Uning fikricha, yangi Bosh vazir Rishi Sunak tez orada soliqlarni oshirish va bir vaqtning o‘zida xarajatlarni qisqartirish muammosiga duch keladi.
“Shu haftada bo‘lib o‘tgan sammit (“Katta yigirmatalik” sammiti — tahririyat) saboqlaridan biri shundaki, yangi kuch markazlari shakllanganini eʼtirof etish kerak. Yangi reallikka ko‘ra, dunyo ko‘p qutbli va u Birlashgan Qirollik o‘z moliyaviy muammolarini hal qilishini yoki shakllanmagan siyosati shakllanishini kutib turmaydi”, – degan Krouford.
Muallif dunyo diplomatiyasi eʼtibori Osiyoga qaratilganini qayd etgan.
Londonda joylashgan iqtisodiy va biznes tadqiqotlari markazi tahlillariga ko‘ra, Buyuk Britaniya 1950 yillardan buyon kuzatilmagan turmush darajasining keskin pasayishi bilan to‘qnashishi mumkin.
Avvalroq Buyuk Britaniyada soliqlarning keng miqyosda oshirilishi eʼlon qilingandi.
