Senatorlar Maskning Twitter‘dagi faoliyatini tekshirmoqchi
Milliarder foydalanuvchilarning shaxsiy maʼlumotlarini xavfga qo‘yishda ayblanmoqda.
AQSH senatidagi 7 nafar demokrat senator Ilon Maskning Twitter‘dagi faoliyatini tekshirishni so‘radi. Shu mazmundagi maktub Federal savdo qo‘mitasi direktoriga yuborilgan.
"Biz Twitter kompaniyasi tomonidan o‘z foydalanuvchilari xavfsizligini qasddan mensimaslik holati haqida yozmoqdamiz va federal savdo qo‘mitasini Twitter tomonidan isteʼmolchilar huquqi himoyasi to‘g‘risidagi qonunlarni buzish bo‘yicha har qanday harakatlarini tekshirishga chaqiramiz. So‘nggi haftalar davomida yangi ijrochi direktor Ilon Mask platformaning yaxlitligi va xavfsizligiga tahdid soluvchi bir qator qarorlarni qabul qildi ", — deyiladi murojaatnomada.
Senatorlarning fikricha, Mask tomonidan kiritilgan o‘zgartirishlar ijtimoiy tarmoq foydalanuvchilarini xavfga solmoqda va federal savdo qo‘mitasi bilan tuzilgan kelishuvning buzilishiga olib kelishi mumkin. Ular zarurat tug‘ilgan taqdirda Twitter rahbariyatini javobgarlikka tortishni so‘ragan.
Tesla asoschisi 27 oktyabr kuni Twitter‘ni sotib oldi. Bu unga 44 milliardga tushgan. Kompaniyani sotib olishi bilan milliarder bir qator menejerlarni ishdan bo‘shatdi. 6 noyabr kuni pullik verifikatsiya xizmati ishga tushirildi. Ammo bu ko‘plab soxta akkauntlarning paydo bo‘lishiga olib keldi.
