AQSH Rossiya qayerdan raketa olayotganini aniq bilmaydi
Avvalroq qator G‘arb nashrlari ruslarda raketa zaxiralari kamaygani haqida yozgandi. Ammo Ukrainaga berilgan so‘nggi ommaviy zarbalar bu taxminlarni oqlamadi.
Ukraina va qator G‘arb davlatlari Rossiyaning raketa zaxiralari tugayotganini taxmin qilgandi, ammo so‘nggi ommaviy raketa zarbalari bu fikrlarni oqlamadi. Bu haqda The New York Times yozmoqda.
Unga ko‘ra, raketa zaxiralari bo‘yicha aniq maʼlumotlar mavjud emas. Strategik va xalqaro tadqiqotlar markazi yetakchi maslahatchisi Mark Kansian G‘arbda sanoqli rasmiy shaxslargina Rossiya raketalari soni haqida aniq bilishini aytgan.
Gazeta bir necha faktorlar Moskvaning ommaviy raketa zarbalari berish qobiliyatini saqlab qolishiga sabab bo‘lganini qayd etgan. Jumladan, RF Eron va KXDRdan snaryad yoki uchuvchisiz qurilmalar sotib olgan bo‘lishi mumkin. Yana bir taxminga ko‘ra, Rossiya mudofaa korxonalaridagi safarbarlik ortidan raketa ishlab chiqarishni yo‘lga qo‘ygan. Shuningdek, Ukraina nizosidan oldin katta zaxira shakllantirilgan yoki hozirgi zarbalarda havo hujumiga qarshi mudofaa tizimi raketalaridan foydalanilgan bo‘lishi ehtimoldan holi emas.
Shu bilan birga The New York Times ushbu taxminlarga aniq dalillar keltirmagan.
Rossiya bir necha bor Erondan dron sotib olganini inkor etgandi. Ammo noyabrda rasmiy Tehron Moskvaga uchuvchisiz qurilmalar yetkazib berganini tan oldi, ammo mamlakat TIV rahbari Amir Abdullohiyan bu Ukraina nizosidan ancha oldin yuz berganini aytgandi.
