Mahbuslarning ish staji hisoblanadigan bo‘ldi
Senat tegishli Qonunni ma‘qulladi.
Senatning 35-yalpi majlisida ayrim qonun hujjatlariga mahkumlarning huquqlari va qonuniy manfaatlarini ishonchli himoya qilishga qaratilgan o‘zgartish va qo‘shimchalar kiritishga oid qonun muhokama qilindi.
Majlisda senator Tolibjon Madumarov nutq so‘zlab, qonunda mahkumlarga bir qator imkoniyatlar yaratilayotganini aytdi.
Qonun 5 ta moddadan iborat bo‘lib, “Fuqarolarning davlat pensiya ta’minoti to‘g‘risida”gi qonunga va Jinoyat-ijroiya kodeksiga ozodlikdan mahrum etishga hukm qilingan shaxslarning umumiy mehnat stajiga ishlangan hamda ijtimoiy soliq to‘langan davrni qo‘shib hisoblashni nazarda tutuvchi o‘zgartirish va qo‘shimchalar kiritilmoqda.
Qonunda ozodlikdan mahrum etishga hukm qilingan shaxslarning jazoni ijro etish muassasalarida jazoni o‘tash davrida bajargan har qanday ishi muassasa tomonidan ijtimoiy soliq to‘langan taqdirda stajga qo‘shib hisoblanishi ko‘rsatilmoqda. Bu orqali mahkumlar kelgusida pensiya olish imkoniyatiga ega bo‘ladi.
Mahkumlarga nisbatan g‘ayriinsoniy yoki qadr-qimmatini kamsituvchi muomala yoki jazo turlarini qo‘llanishiga yo‘l qo‘yilmasligi belgilanmoqda.
Mahkumlarning tarjimon bilan bir qatorda, surdo tarjimon xizmatidan foydalanishiga ham ruxsat berilmoqda.
Mahbuslarga nisbatan tinchlantirish ko‘ylagini qo‘llash mumkin emasligi belgilanmoqda.
Birinchi va ikkinchi guruh nogironligi bo‘lgan mahkumlarning yashash maydonini 2,5 metr kvadratdan 3 metr kvadratgacha oshirish hamda umumiy turur joylarni maxsus moslamalar bilan jihozlangan bo‘lishi nazarda tutilmoqda.
Mahkumlarning tuzalish yo‘liga o‘tganini baholovchi qat’iy mezonlar belgilash orqali ularni rag‘batlantirish masalalari, ozodlikdan mahrum etishga hukm qilingan shaxslar ishdan bo‘sh soatlar va tungi dam olish vaqtidan tashqarida bemalol kinofilm va teleko‘rsatuvlar ko‘rishi mumkinligi aniq belgilab berilmoqda, — dedi senator.
Qonun senatorlar tomonidan ma’qullandi.
