Zelenskiy: Rossiyaning maqsadi tinchlik emas, qisqa tanaffus olish
Ukraina Prezidenti bundan ko‘zlangan maqsadni ochiqladi.
Rossiya qisqa muddatli yarashuv hisobiga harbiy harakatlardan tanaffus olmoqchi. Bu haqda Ukraina Prezidenti Vladimir Zelenskiy maʼlum qildi.
“Rossiya hozir qisqa muddatli yarashuvga intilmoqda — maqsad kuchlarni tiklash uchun tanaffus olish. Kimdir buni urushning yakuni deyishi mumkin, ammo bunday to‘xtalishlar vaziyatni yana-da yomonlashtiradi”, – degan Prezident Galifaks xalqaro xavfsizlik forumidagi onlayn chiqishida.
Zelenskiyning fikricha, hududiy yon berishlar Rossiya bilan tinchlikni kafolatlamaydi. U haqiqiy barqarorlikka erishish uchun RF agressiyasi unsurlarini butunlay yo‘q qilish kerakligini taʼkidlagan.
Ukraina yetakchisi tinchlik uchun 10 ta tashabbusini eslatgan. Ularning orasida Rossiya qo‘shinlarini butunlay olib ketish, radiatsion va yadro xavfsizligi, oziq-ovqat va energetik xavfsizlik, barcha asir va deportatsiya qilinganlarni ozod qilish, BMT Nizomiga rioya etish va Ukraina hududiy yaxlitligini tiklash kabi shartlar bor.
