Andijondagi ko‘p qavatli uyda yong‘in chiqdi
Voqea joyiga viloyat hokimi ham yetib borgan.
Bugun, 20 noyabr kuni Andijon shahridagi ko‘p qavatli uylardan birida yong‘in sodir bo‘ldi. Holat yuzasidan viloyat Favqulodda vaziyatlar boshqarmasi ma’lumot berdi.
Qayd etilishicha, soat 21:09 da Andijon shahar “O‘rikzor” MFY 3-kichik dahasida joylashgan ko‘p qavatli uylarning birida yong‘in sodir bo‘layotganligi to‘g‘risida viloyat FVBga xabar kelib tushgan.
Shunga ko‘ra 12 ta yong‘in-qutqaruv ekipaji va 3 ta avtonarvon soat 21:18 da voqea joyiga yetib borib, yong‘in soat 21:40 da qurshab olingan va soat 22:25 da bartaraf etilgan.
Yong‘in natijasida ko‘p qavatli uyning taxminan 400 kvadrat metr maydonda tom qismi yonib zararlangan.
Hodisa oqibatida tan jarohati olgan va halok bo‘lganlar yo‘q.
Hozirda yong‘inning kelib chiqish sababi va moddiy zarar miqdori aniqlanmoqda.
Viloyat hokimi mazkur ko‘p qavatli turar joyda istoqomat qiluvchi fuqarolar bilan uchrashib, vaziyat to‘liq nazoratga olinib bartaraf yetilgani hamda yuzaga kelgan holat bo‘yicha tezkor chora-tadbirlar ko‘rilishi, fuqarolarga barcha zaruriy ko‘mak ko‘rsatilishini ta’kidlagan.
