Shahrisabzda yong‘inni o‘chirishga ketayotgan FVB mashinasi YTHga uchradi
Holat bo‘yicha boshqarma ma’lumot berdi.
Bugun, 25-noyabr kuni Qashqadaryo viloyatining Shahrisabz tumanida ikkita avtomashina ishtirokida yo‘l-tansport hodisasi sodir bo‘ldi. Holat yuzasidan viloyat Favqulodda vaziyatlar boshqarmasi rasmiy munosabat bildirdi.
Qayd etilishicha, soat 18.25 larda FVB qutqaruv xizmatiga Shahrisabz shahar “Katta navqat” ko‘chasida daraxt yonayotganligi to‘g‘risida xabar kelib tushgan. Shundan so‘ng ISUZU rusumli yong‘in-qutqaruv mashinasi voqea joyiga harakatlanib borayotgan vaqtida shaharning Ipak yo‘li va Tarag‘ay Bahodir ko‘chalari chorrahasida qarama-qarshi yo‘nalishdan harakatlanib kelayotgan Cobalt rusumli avtomobil bilan to‘qnashgan.
Natijada Cobalt avtomobili haydovchisi tan jarohati olib shifoxonaga yotqizilgan. Holat bo‘yicha surishtiruv ishlari olib borilmoqda.
