Ukrainada qancha odam bedarak yo‘qolgani ochiqlandi
Shu bilan birga bu maʼlumotlar hali to‘liq emasligi aytilmoqda.
Ukrainadagi harbiy mojaro davrida 15 ming odam bedarak yo‘qoldi. Bu haqda bedarak yo‘qolgan shaxslar bo‘yicha xalqaro komissiya (ICMP) maʼlum qildi.
Gaagada joylashgan ushbu tashkilot Bolqon yarimorolidagi urushlardan keyin tuzilgan. Iyul oyida uning Kiyevda ofisi ochildi. Bundan ko‘zlangan maqsad — Ukrainaga bedarak yo‘qolganlar bo‘yicha hujjatlarni tuzish va ularni qidirishda yordam berish.
ICMP‘ning Yevropa bo‘yicha direktori Metyu Xollideyning so‘zlariga ko‘ra, qancha odam majburan ko‘chirilgani, Rossiya tomonidan hibsda saqlanayotgani, oilasidan ayrilgani, bedarak yo‘qolganlarning qanchasi tirik ekani maʼlum emas. Tashkilot vakili nizo yakunlangandan keyin ham bu odamlarni qidirish uchun yillar ketishini taʼkidlagan.
"Raqamlar va Ukraina hozir to‘qnash kelayotgan muammolar juda katta. Hozirda eng muhimi imkon qadar ko‘proq odamlarning taqdiriga aniqlik kiritish", — degan Xollidey.
