Samarqandda “Xalq banki” xodimi pora bilan ushlandi
U salkam 100 mlnlik davlat bojini yo‘qotib bermoqchi bo‘lgan.
Samarqand viloyatining Samarqand shahrida bank xodimi pora olayotgan vaqtida qo‘lga tushdi. Bu haqda viloyat IIB axborot xizmati xabar berdi.
Maʼlum bo‘lishicha, 2022-yil 21-noyabr kuni fuqaro huquqni muhofaza qiluvchi organlarga ariza bilan murojaat qilib, bank xodimi moddiy manfaatdorlik evaziga davlat bojini yo‘qotib berishini aytganini va ushbu shaxsga nisbatan qonuniy chora ko‘rilishini so‘ragan.
Fuqaro “Xalq banki”ning Samarqand viloyat filialidan 830 mln so‘m kredit olgan va xususiy korxonasi garovga qo‘yilgan. To‘lovni vaqtida to‘lay olmagani sababli kredit qarzdorligi bo‘yicha ish sudga oshirilgan. Bank xodimi esa sud tomonidan tayinlanadigan 93 mln so‘m davlat bojini yo‘qotib berishini aytib, evaziga 3 ming AQSH dollari miqdorida pul so‘ragan va dastlab 1050 AQSH dollari olgan.
Arizaga asosan 21-noyabr kuni IIB Jinoyat qidiruv boshqarmasi Korrupsiya va iqtisodiy jinoyatlarga qarshi kurashish bo‘limi, DXX hamda viloyat prokuraturasi hamkorligida o‘tkazilgan tezkor tadbir davomida bank xodimi ariza muallifidan qolgan 1950 AQSH dollari miqdoridagi pullarni olayotgan vaqtida ashyoviy dalillar bilan qo‘lga tushgan.
Hozirda u Jinoyat protsessual kodeksining 227-moddasi tartibida ushlanib, unga nisbatan jinoyat ishi qo‘zg‘atilgan va ehtiyot chorasi sifatida qamoqqa olingan.
