Namanganda 16 yoshli o‘smir o‘zganing avtomashinasini olib qochib, YTHga uchradi
Hozirda unga nisbatan jinoyat ishi qo‘zg‘atilgan.
Namangan viloyatining Chortoq tumanida o‘zganing avtomashinasini olib qochgan fuqaro yo‘l-transport hodisasiga uchradi. Bu haqda IIV huzuridagi Tergov departamenti xabar bermoqda.
Qayd etilishicha, 21 noyabr kuni Chortoq tumanida yashovchi 29 yoshli A.O. tuman IIBga ariza bilan murojaat qilib, shu kuni soat 02:30 larda noma’lum shaxs yashash xonadoni oldida unga tegishli bo‘lgan “Nexia-2” rusumli avtomashinasining qarovsiz qoldirilganligidan foydalanib, olib qochib ketilganligini ma’lum qilgan.
Olib borilgan tezkor-qidiruv ishlar natijasida jabrlanuvchiga tegishli bo‘lgan “Nexia-2” rusumli avtomashina noma’lum shaxs tomonidan Pop tumani “Qo‘shminor” MFYdan o‘tuvchi A-373 Toshkent–O‘sh avtomobil yo‘lining 249-kilometrida dastlab yo‘l chetidagi beton ustunga urilib, so‘ngra pastlikka tushib ketgan holda topilgan.
Mazkur jinoyatni sodir etgan shaxsga dastlab birinchi tez-tibbiy yordam ko‘rsatilib, shaxsiga oydinlik kiritilganda u muqaddam sudlangan Chortoq tumanida yashovchi voyaga yetmagan 16 yoshli M.A. ekanligi aniqlangan.
Mazkur holat yuzasidan M.A.ga nisbatan Jinoyat kodeksning 267-moddasi 1-qismi (transport vositasini olib qochish) bilan jinoyat ishi qo‘zg‘atilib, haydovchiga jiddiy shikast yetmaganligi sababli unga nisbatan qamoqqa olish tarzdagi ehtiyot chorasi qo‘llanilgan. Hozirda tergov harakatlari olib borilmoqda.
