Kuleba: Ayrim davlatlar injiqliklariga qaram bo‘lmaslik uchun o‘zimiz qurol ishlab chiqarishimiz kerak
Ukraina TIV rahbari ayrim davlatlarning Kiyevga yetarli darajada qurol bermayotganini maʼlum qildi.
Ayrim davlatlar siyosiy sabablarga ko‘ra Ukrainaga yetarli miqdorda qurol sotmayapti. Bu haqda Ukraina tashqi ishlar vaziri Dmitriy Kuleba Politico nashriga bergan intervyusida maʼlum qildi.
Diplomat Kiyevda tanklar va havo hujumiga qarshi mudofaa tizimlariga katta ehtiyoj borligini aytgan. Uning so‘zlariga ko‘ra, joriy vaziyatda qurol yetkazib berish masalasi yana-da dolzarblashgan.
“Biz bir faktni tan olishimiz kerak: dunyoda Ukrainaga zarur narsalarga egalik qiladigan davlatlar bor, ammo ular siyosiy sabablarga ko‘ra uni yetarli miqdorda sotmayapti”, – degan TIV rahbari.
Vazirning fikricha, bu davlatlarni ko‘ndirishga ketadigan vaqt o‘rniga Ukrainaning o‘zi qurol ishlab chiqarishni yo‘lga qo‘yishi kerak.
Bundan oldin The New York Times gazetasi NATOning kichik davlatlarida qurol zaxiralari tugagani to‘g‘risida xabar bergandi.
