Makron va qator Yevropa yetakchilari AQSHning yangi iqtisodiy siyosatidan norozi
Yozda Jozef Bayden Amerika iqtisodiyotini qo‘llab-quvvatlash uchun 400 milliard dollar ajratilishini ko‘zda tutuvchi qonunni imzolagandi.
Fransiya prezidenti Emmanuel Makron va boshqa Yevropa yetakchilari AQSHning yangi iqtisodiy siyosatidan norozi bo‘lmoqda. Ularning fikricha, bu Ukraina mojarosi va energetik inqiroz tufayli kelib chiqqan iqtisodiy muammolarni chuqurlashtirmoqda.
The Wall Street Journal gazetasining maʼlumotlariga ko‘ra, Makronning Jozef Bayden bilan uchrashuvida yuqoridagi masala muhokamalar markazida bo‘ladi. Fransiya yetakchichi Bayden tomonidan imzolangan inflyatsiyani pasaytirish to‘g‘risidagi qonunni Yevropa sanoati uchun tahdid sifatida ko‘rmoqda. Ushbu qonun Amerika iqtisodiyotini qo‘llab-quvvatlash uchun yirik subsidiyalar va soliq imtiyozlari berishni nazarda tutadi. WSJ bilan suhbatlashgan amaldorlar buning ortidan Yevropada ishlab chiqarilgan ko‘plab tovarlar — akkumulyator va elektromobillarga zarar yetkazilishini aytgan, chunki imtiyozlar Shimoliy Amerikada chiqqan mahsulotlarga joriy etiladi.
Parij energetik resurslarning narxi baland bo‘lgan bir paytda aksariyat ishlab chiqaruvchilarning subsidiya va imtiyoz olish uchun AQSHga ko‘chib o‘tishidan xavotirga tushgan. Buning oldini olish uchun Makron o‘tgan haftada yirik kompaniyalarning rahbarlari bilan Yelisey saroyida uchrashgan va ulardan mamlakatni tark etmaslikni so‘ragan. WSJ qator kompaniyalar bilan bog‘lanib, vaziyatga oydinlik kiritishga harakat qilgan, ammo ular uchrashuv haqida hech narsa demagan.
Fransuz rasmiylariga ko‘ra, Makron AQSH prezidentidan yangi qonunda Yevropa kompaniyalari uchun istisno joriy etishni so‘ramoqchi. Oq uyning nomi sir qolishni istagan manbalari ushbu masala ikki davlat yetakchilari muhokamasi markazida bo‘lishini taxmin qilgan. Makron, shuningdek, Yevroittifoqni AQSH qonuniga nisbatan birgalikda javob qaytarishga chaqirgan. U E:vropa ichida soliq imtiyozlarini ishlab chiqishni taklif qilgan.
Bayden yozda inflyatsiyani yumshatishga qaratilgan qonun loyihasini imzoladi. Bu tashabbus Amerika iqtisodiyotini qo‘llab-quvvatlash uchun 400 milliard dollar ajratishni ko‘zda tutadi.
