O‘zbekistonda aloqa xodimlari uchun ko‘krak nishoni ta’sis etildi
Bu bo‘yicha Hukumat qarori qabul qilindi.
Kecha, 29 dekabr kuni Hukumat qarori bilan Axborot-kommunikasiya texnologiyalari sohasida “Mohir aloqachi” ko‘krak nishoni va “O‘z kasbining ustasi” belgisi ta’sis etildi. Bu haqda “Huquqiy axborot” telegram kanalida xabar qilidi.
Qarorga ko‘ra, “Mohir aloqachi” ko‘krak nishoni bilan – axborot texnologiyalari va kommunikasiyalari sohasini rivojlantirishga katta hissa qo‘shgan hamda sohada kamida 15 yil mehnat stajiga ega fuqarolar taqdirlanadi.
“O‘z kasbining ustasi” belgisi bilan – axborot texnologiyalari va kommunikasiyalari sohasida faoliyat ko‘rsatayotgan muhandis, elektromontyor, kabelchi, pochtachi, antennachi-machtachi, operator, feld’yeger kabi ommaviy kasb egalari sohani rivojlantirishga qo‘shgan munosib hissasi uchun taqdirlanadi.
Axborot texnologiyalari va kommunikasiyalarini rivojlantirish vazirligi tizimidagi tashkilotlar ko‘krak nishoni hamda “O‘z kasbining ustasi” belgisi bilan taqdirlash bo‘yicha takliflarni har yili 1 aprelgacha vazirlikka taqdim etadi.
Ko‘krak nishoni hamda “O‘z kasbining ustasi” belgisi har yili 7 may – aloqa sohasi xodimlarining kasb bayrami arafasida topshiriladi.
Taqdirlanganlarga BHMning to‘rt yarim baravari (1 mln 350 ming so‘m) miqdorida biryo‘la to‘lanadigan pul mukofoti beriladi. Mazkur ko‘krak nishoni va belgi bilan bir shaxs bir marta mukofotlanadi.
