Rossiyada cho‘chqa grippi avj olmoqda
Mazkur infeksiya sabab 2009-yilda 12,1 ming kishi vafot etgan.
Rossiyada cho‘chqa grippi epidemiyasi avj olmoqda. Bu haqda mamlakat Iste’molchilar huquqlarini himoya qilish federal xizmati xabar berdi.
Qayd etilishicha, hozirgacha ushbu virus davlatning 55 ta ma’muriy hududida ro‘yxatga olingan. Xastalikning aniqlanayotgan mutasiyalari orasida A (H1N1), A (H3N2) va B shtammlari ustuvorlik qilyapti.
Mutaxassislarga ko‘ra, bu kasallikni an’anaviy gripp turlaridan alomatlari orqali farqlash qiyin. Chunki yuqori tana harorati, tomoq, bosh va mushaklardagi og‘riqlar, yo‘tal, holsizlik, bezovtalik kabi simptomlar har ikkisiga xos. Shu bois aniq tashxis qo‘yish uchun maxsus PZR testlari talab etiladi.
Eslatib o‘tamiz, 2009-yilda jahon bo‘yicha ommaviy cho‘chqa grippi epidemiyasi kuzatilgan edi. O‘shanda bir yil davomida 60,8 million nafarga yaqin odam ushbu xastalik bilan kasallangan. Achinarlisi, bemorlardan 12,4 ming nafari infeksiya oqibatida hayotdan ko‘z yumgan.
