Markaziy Osiyo va Germaniya muqobil transport yo‘laklarini rivojlantirishdan manfaatdor
Polshada Markaziy Osiyo va Germaniya tashqi ishlar vazirlari uchrashuvi bo‘lib o‘tdi.
YEXHT tashqi ishlar vazirlari kengashi yig‘ilishi doirasida "Markaziy Osiyo va Germaniya Federativ Respublikasi" vazirlar uchrashuvi bo‘lib o‘tdi. Bu haqda Qozog‘iston tashqi ishlar vazirligi xabar berdi.
"Kun tartibiga Markaziy Osiyodagi hamkorlik, Afg‘onistondagi xavfsizlik, iqlim o‘zgarishining mintaqa iqtisodiyotiga taʼsiri va boshqa masalalar kiritildi. Alohida eʼtibor Markaziy Osiyo va Yevropa davlatlari xamkorligiga, xususan, mintaqalararo savdo va Yevropa Ittifoqining Global Gateway dasturi doirasida transport infratuzilmasini rivojlantirishga qaratildi", — deyiladi TIV xabarida.
Qozog‘iston tashqi ishlar vaziri Muxtor Tleuberdi transport-tranzit sohasida hamkorlik masalasi so‘nggi geosiyosiy o‘zgarishlar fonida yana-da dolzarb ahamiyat kasb etib borayotganini qayd etgan. Tomonlar muqobil transport yo‘laklari, jumladan, Transkaspiy xalqaro transport yo‘nalishini rivojlantirishdan birdek manfaatdor ekanini taʼkidlagan.
