Norov YXHT qiyin kunlarni boshdan kechirayotganini maʼlum qildi
O‘zbekiston TIV rahbari tashkilot faoliyatini takomillashtirish bo‘yicha qator muhim tashabbuslarni ilgari surdi.
O‘zbekiston Respublikasi Tashqi ishlar vaziri Vladimir Norov YXHT Vazirlar kengashining navbatdagi yig‘ilishida so‘zlagan nutqida tashkilot faoliyatini takomillashtirish bo‘yicha takliflarni bildirdi.
YXHT qiyin kunlarni boshidan kechirayotgani, ishtirokchi davlatlar o‘rtasidagi ishonch darajasi pasaygani, ziddiyatli vaziyatlar tez-tez uchrayotgani taʼkidlandi.
Bunday sharoitda geosiyosiy raqobat va mafkuraviy qarama-qarshiliklardan xoli muloqot, shuningdek, ishtirokchi-davlatlar duch kelayotgan barcha murakkab muammolarning yechimlarini birgalikda izlash nihoyatda dolzarb ahamiyatga ega va bu YEXHT kun tartibining asosi bo‘lib qolishi kerak.
Shu nuqtayi nazardan, Norov yig‘ilish ishtirokchilari eʼtiborini O‘zbekiston Prezidenti tomonidan ilgari surilgan “Umumiy xavfsizlik va farovonlik yo‘lida hamjihatlik borasidagi Samarqand tashabbusi”ning dolzarbligiga qaratdi. Ushbu tashabbus dunyo davlatlari va xalqlarining madaniy, millatlararo, dinlararo o‘zaro munosabatlarni rivojlantirish orqali mavjud qarama-qarshilik va kelishmovchiliklarni yumshatish maqsadida saʼy-harakatlari birlashtirishga qaratilgan.
O‘zbekiston Tashqi ishlar vaziri YXHT doirasidagi hamkorlarini ushbu tashabbusni qo‘llab-quvvatlashga chaqirdi.
