O‘zbekisonda nega birdan koronovirus avj olyapti?
SSV holat bo‘yicha ma’lumot berdi.
O‘zbekistonda “omikron”ning VA.5 varianti dominant versiyaga aylandi, deya xabar bermoqda Sog‘liqni saqlash vazirligi matbuot xizmati.
Qayd etilishicha, mamlakatda noyabr oyidan boshlab koronavirusga chalingan bemorlar soni sezilarli darajada ortmoqda. Xususan, kecha respublika bo‘yicha 159 kishida kasallik ro‘yxatga olingan.
O‘sish dinamikasi, avvalo, kunlar sovib, odamlar asosiy vaqtini yopiq bino va inshootlarda o‘tkazayotgani bilan bog‘liq. Qolaversa, COVID-19ning yuqumlilik darajasi yuqori bo‘lgan yangi mutasiyalari bemorlar soni ko‘payishiga sabab bo‘lyapti.
O‘zbekistonda “omikron”ning qaysi subvarianti dominant versiyaga aylanganini aniqlash maqsadida joriy yil 10-12 noyabr kunlari Respublika maxsus 1-son Zangiota yuqumli kasalliklar shifoxonasiga gospitalizasiya qilingan 27 nafar bemordan tibbiy namunalar olingan.
Shundan so‘ng ushbu tahlillar Innovasion rivojlanish vazirligi qoshidagi Ilg‘or texnologiyalar markazida sekvenlash jarayonidan o‘tkazilgan. Natijada 27 nafar bemor “omikron” shtammining BA.5 subvarianti bilan zararlangani ma’lum bo‘lgan.
BA.5 subvariantining yashirin davri boshqa shtammlar singari 5-6 kun emas, 2-3 kunni tashkil etyapti.
