Samarqandda o‘quvchining onasi maktab “zamdirektori”ni kaltakladi
IIB matbuot kotibi hodisa sababini ma’lum qildi.
Ijtimoiy tarmoqlarda Samarqand viloyatining Toyloq tumanida maktab direktori o‘rinbosarining kaltaklangani haqida xabarlar tarqaldi. Holat yuzasidag viloyat IIB matbuot kotibi ma’lumot berdi.
Qayd etilishicha, 17-noyabr kuni Toyloq tumanidagi 6-son umumta’lim maktabi o‘quvchisi — 2007-yilda M.D. dars vaqtida ruchkani sinfdoshiga qarata otgan. Ruchka uning sinfdoshi — 2007-yilda tug‘ilgan X.N.ning ko‘ziga tegib jarohat yetkazgan. Shundan so‘ng o‘quvchi shifoxonaga olib borilib, unga tibbiy yordam ko‘rsatilgan.
Mazkur holatdan xabar topgan voyaga yetmagan X.N.ning onasi — Toyloq tumani “Davlatobod” mahallasida yashovchi 1982-yilda tug‘ilgan V.Sh. umumta’lim maktabiga borib, maktab direktorining ma’naviy va ma’rifiy ishlar bo‘yicha o‘rinbosari bilan tortishib, qizini shu ahvolga tushishiga uni sababchi qilib ko‘rsatib, turli joylariga urib, jarohat yetkazgan.
Hozirda holat yuzasidan Toyloq tumani IIB tomonidan tergovga qadar tekshiruv harakatlari olib borilmoqda.
