“Elektr ta’minotida cheklovlar kiritilmoqda”
Rasmiylar hududlardagi “svet” o‘chishiga izoh berdi.
O‘zbekistonning ayrim hududlarida elektr ta’minotida uzilishlar kuzatilmoqda. Bu haqda “Hududiy elektr tarmoqlari” AJ xabar qilmoqda.
Ta’kildanishicha, respublikaga kirib kelgan sovuq havo oqimi, ayni paytda ko‘plab hududlarda qalin qor yog‘ishi va haroratning keskin tushib ketishi natijasida elektr energiyasiga bo‘lgan talab cyezilarli darajada ortgan.
Ana shunday vaziyatda magistral gaz quvurlari va tarmoqlarida tabiiy gaz bosimining keskin pasayishi kuzatilib, elektr energiyasi ishlab chiqaruvchi issiqlik elektr stansiyalariga belgilangan hajmlardan kam miqdorda tabiiy gaz yetib borishi natijasida elektr energiyasi ishlab chiqarish hajmi ham mos ravishda tushib ketishiga sabab bo‘lmoqda.
Joriy yilning 4 dekabr kuni respublika bo‘yicha elektr energiyasi iste’moli 219 mln kilovatt soatni tashkil etgan bo‘lib, bu o‘tgan yilga nisbatan 22 mln kilovatt soat yoki 11 foizga ko‘p. Shuningdek, dekabr oyining dastlabki 4 kunida respublika bo‘yicha iste’mol hajmi 875 mln kilovatt soatni tashkil etib, bu o‘tgan yilga nisbatan 93 mln kilovatt soat yoki 12 foizga ko‘p.
“Energetika tizimining barqaror ishlashini ta’minlash va elektr energiya ishlab chiqarish ob’yektlari, yuqori va past kuchlanishli elektr tarmoqlari hamda transformator punktlarida yirik avariyalar vujudga kelishini oldini olish maqsadida Respublikamizning turli hududlarida elektr ta’minotida cheklovlar kiritilmoqda”, — deyiladi xabarda.
