Talabalarning qishki taʼtili qachon boshlanadi?
Oliy va o‘rta maxsus taʼlim vazirligi bu bo‘yicha maʼlumot berdi.
Talabalar va professional taʼlim muassasalari o‘quvchilari uchun qishki taʼtil muddati — 2022 yilning 26 dekabridan 2023 yil 9 yanvariga qadar etib belgilandi.Bu haqda AOKAda Oliy va o‘rta maxsus taʼlim vazirligi axborot xizmati tomonidan o‘tkazilgan brifingda maʼlum qilindi.
OTMlarning talabalar turar joylari 2023 yil 5 yanvardan faoliyatini boshlaydi.
Qayd etilishicha, transport vazirligi hamda “O‘zbekiston temir yo‘llari” va “Uzbekistan airways” bilan kelishuv asosida doimiy yashash joylariga borib-keladigan talaba va o‘quvchilar uchun qo‘shimcha joylar (reyslar) sonini yana-da ko‘paytirish, oliy taʼlim muassasalari rahbariyati tomonidan tavsiya etilgan joylarda sayyor kassalar tashkil etish choralari ko‘riladi.
Shuningdek, qishki taʼtil vaqtida sog‘lomlashtirish maskanlarida dam olish, salomatligini tiklash istagida bo‘lgan professor-o‘qituvchilarga tegishli sharoitlar yaratish hamda talaba-o‘quvchilar va professor-o‘qituvchilarning ichki turizmga jalb etilishini taʼminlash choralari ham ko‘riladi.
