450 dan ortiq fuqaroning kartasidagi pullarni “uxlatgan” jinoiy guruh qo‘lga olindi
Ular Telegram orqali guruh va kanallar ochib, odamlarning ishonchiga kirgan.
Navoiy viloyati Zarafshon shahrida yashovchi N.M. ariza bilan murojaat qilib, Telegram messenjerida nomaʼlum shaxs feyk xabar orqali uning bank kartasi boshqaruvini qo‘lga kiritib, jami 2.780.000 so‘m pullarini yechib olganini bildirib, nomaʼlum shaxsga nisbatan qonuniy chora ko‘rishni so‘ragan.
Olib borilgan tezkor-qidiruv tadbirlari natijasida ushbu jinoyatni bir guruh shaxslar o‘zaro jinoiy til biriktirib sodir etgani aniqlangan.
Jinoiy guruh aʼzolari Navoiy viloyati Xatirchi tumanida yashovchi, muqaddam Jinoyat kodeksining 168-moddasi bilan sudlangan, 2006 yilda tug‘ilgan A.A. va uning akasi 2001yilda tug‘ilgan A.Sh., Buxoro viloyati Kogon tumanida yashovchi, Tojikiston Respublikasida 1985 yilda tug‘ilgan N.B. va uning o‘g‘li 2006 yilda tug‘ilgan B.D. ekani maʼlum bo‘ldi.
Guruh soxta havolalardan foydalanib, Telegram messenjeridagi guruh va kanallarda yolg‘on xabarlarni tarqatib jami 454 nafar fuqaroning bank kartalari boshqaruvini qo‘lga kiritib, juda ko‘p miqdordagi pullarni o‘zlashtirgan.
Guruh aʼzolariga nisbatan Jinoyat kodeksining 168-moddasi bilan jinoyat ishi qo‘zg‘atilib, tergov harakatlari olib borilmoqda.
