Ayrim hududlardagi ko‘p qavatli uylarda issiqlik taʼminoti susaydi

 

Respublika bo‘ylab elektr taʼminotida uzilishlar va gaz bosimining pasayib ketishi ortidan uchta qozonxona vaqtincha o‘chirildi. Bu haqda Uy-joy kommunal xizmat ko‘rsatish vazirligi matbuot xizmati xabar bermoqda. 

 

Qayd etilishicha, bugungi kunda vazirlik tizimidagi qozonxonalar jami 495 tani tashkil qiladi. 492 tasi mavjud imkoniyatlardan foydalangan holda ish faoliyatini davom ettirmoqda. Toshkent, Xorazm va Farg‘ona viloyatlarida joylashgan 21 ta qozonxonada gaz bosimining meʼyorida bo‘lmaganligi bois isteʼmolchilar belgilangan parametrlardan past ko‘rsatkichda issiq suv va issiqlik energiyasi bilan taʼminlanishiga sabab bo‘lmoqda. Gaz bosimi meʼyorida bo‘lmaganligi tufayli 3 ta qozonxonani vaqtincha o‘chirishga to‘g‘ri kelgan.

 

Shuningdek,poytaxtda ham issiqlik energiyasi “Toshkent Issiqlik markazi”, “Toshkent IYES” va “Veolia Energy Tashkent” ning mahalliy qozonxonalarida tabiiy gazdan foydalangan holda ishlab chiqarilishi, Toshkentning Issiqlik markazi-3, 5 va 9-qozonxonalari faoliyatida ham yuqoridagi holat kuzatilmoqda. Ushbu issiqlik markazlaridan Shayxontohur, Chilonzor va Uchtepa tumanlari aholisi va ijtimoiy obektlariga issiqlik energiyasi yetkazib beriladi.

 

“Gaz bosimining yetarli emasligi qozonxonalarning avtomatik tarzda o‘chishiga sabab bo‘ladi. Albatta, bu holatda issiqlik taʼminoti uchun masʼul tashkilotlar vaziyatni yaxshilash uchun o‘zaro hamkorlikda kuchaytirilgan rejimda ishlamoqda. Mutaxassislar muammoli hududlarni aniqlash uchun joylarga borib, issiqlik energiyasini qayta taqsimlash bo‘yicha ishlarni muvofiqlashtirib bormoqda”, – deyiladi rasmiy xabarda.

 

Avvalroq, bloger Aziza Qurbonova poytaxtning Uchtepa tumani (ko‘plab mahallalari) yana tushkunlik domida ekanini aytib, ijtimoiy tarmoqda post qoldirgandi: 

 

"Gaz yo‘q, elektr toki yo‘q. Trubalar muzlagan. Uylar sovigan. Rutubatli uyda odamning hamma narsadan ensasi qotib ketadi. Choy ichish uchun qora qumg‘on ham yo‘q. Qora qumg‘on topish kerak. Qayerda sotadi?!

Mahalla kelinlari yozishyapti.

— Bir narsa qiling?! Yakshanbada hamma uyda, ovqat qilish kerak, kir-chir, cho‘milish kerak. Bolalar shamollaydi…

Hay, men nima qila olaman?

Faqat noliy olaman.

Men faqat choy damlaydigan jinman.

O‘shanda ham qora qumg‘on topolsam, albatta," — degan bloger.