Chirchiqda bozorqo‘m va non sotuvchilar janjallashdi
Viloyat IIB hodisa tafsilotlarini ma’lum qildi.
Ijtimoiy tarmoqlarda Toshkent viloyatining Chirchiq shahridagi dehqon bozorida bozorqo‘m bilan sotuvchilar o‘rtasida janjal sodir bo‘lgani aks etgan videolar tarqaldi. Holat yuzasidan IIB matbuot kotibi Bobur To‘laganov rasmiy izoh berdi.
Aniqlanishicha, jarayonda ishtirok etgan 56 yoshli fuqaro T. T. (1-kichik nohiya dehqon bozori maʼmuriyati boshlig‘i) shu bozorda non sotuvchi ayol va uning 22 yoshli o‘g‘li bilan ular non rastasidan tashqarida savdo qilayotganligi uchun tortishgan va bu voqea janjalga aylangan.
Ishtirokchilarning harakatlarida Maʼmuriy javobgarlik to‘g‘risidagi kodeksning 183-moddasida ko‘rsatilgan huquqbuzarlik alomatlari borligi sababli to‘plangan hujjatlar qonuniy chora ko‘rish uchun sudga yuborilgan.
“Yakuniy natija bo‘yicha jamoatchilik uchun batafsil maʼlumot beriladi”, — deyiladi xabarda.
