Toshkentdagi maktabda sham yorug‘ida dars o‘tildi
Holatda hokimlik munosabat bildirdi.
Ijtimoiy tarmoqlarda Toshkent shahrining Chilonzor tumanidagi 280-maktabda o‘quvchilar sham yorug‘ida mashg‘ulot o‘tayotgani haqida xabar tarqaldi. Holat yuzasidan tuman hokimligi rasmiy munosabat bildirdi.
Maʼlum qilinishicha, surat joriy yilning 6-dekabrida olingan. Chunki 6-dekabr kuni maktab joylashgan mavzeda katta nosozlik yuz bergan va ortiqcha yuklama bo‘lgani uchun transformator podstansiyasida shaxmat taxtasi tartibida elektr quvvati vaqtincha o‘chirilgan.
O‘sha kuni maktabdagi 66 ta sinfxonadan 17 tasida elektr taʼminoti bo‘lmagan. Bulutli ob-havo sabab ertalab sinfxonalarda odatdagi kunlarga qaraganda yorug‘lik pastroq bo‘lgan va o‘qituvchilardan biri o‘z tashabbusi bilan sham yoqqan.
Muammo yuzasidan maktab maʼmuriyatining Chilonzor tuman xalq taʼlimi bo‘limi va hokimlik huzuridagi shtabga yetkazgan xabariga ko‘ra, 7 dekabr kuni tarmoqdagi muammo tuman Elektr tarmoqlari korxonasi tomonidan bartaraf etilgan. Hozirda maktab elektr quvvati bilan to‘liq taʼminlangan.
