“Bolaning hayotini saqlab qolish uchun o‘z lavozimimdan voz kechardim”
Ichki ishlar vaziri o‘rinbosari IIB binosida o‘smirning vafot etganiga munosabat bildirdi.
Avvalroq Farg‘ona viloyatining Qo‘qon shahridagi IIB binosida 15 yoshli o‘smirning vafot etgani xabar qilingandi.
Viloyatning Uchko‘prik tumanida yashagan, 2007 yilda tug‘ilgan R.A. 16 oktyabr kuni Buvayda tumanidagi “Ansor” savdo majmuasiga ota-onasining nazoratisiz aylangani borgan. U o‘g‘irlik qilmoqchi bo‘lganida IIB xodimlari tomonidan ushlangan va Qo‘qon shahridagi voyaga yetmaganlarga ijtimoiy-huquqiy yordam ko‘rsatish markaziga yuborilgan.
17 oktyabr kuni R.A.ning sog‘lig‘i yomonlashib, hushidan ketgani sababli unga tez tibbiy yordam ko‘rsatilgan, biroq shifoxonaga olib ketilayotgan vaqtida bola vafot etgan.
Holat yuzasidan Ichki ishlar vaziri o‘rinbosari, polkovnik Bekmurod Abdullayev o‘z fikrlarini bildirib o‘tdi.
“Bir norasidani voyaga yetkazish qancha mashaqqat talab etadi?! Eslasam, hamon yuragim og‘riydi. Bu holat haqiqiy sovuqqonlik bo‘ldi. Xatoga yo‘l qo‘ygan xodimlar qamoqqa olindi. O‘zim boshchiligimda attestasiya komissiyasi tashkil etildi. Xodimlar to‘liq shahodatlashdan o‘tadi.
Tan olaman, bu voqea tizimning kechirilmas xatosi bo‘ldi. Bir yil oldin Vazirlar Mahkamasining qarori bilan tasdiqlangan “Voyaga yetmaganlarga ijtimoiy-huquqiy yordam ko‘rsatish markazlari to‘g‘risida”gi nizomni ishlab chiqishda bosh-qosh bo‘lganmiz. Mas’uliyatni bo‘ynimizga olganmiz. Prezidentga mazkur tizimni “ipidan ignasigacha” to‘g‘ri tashkil etish uchun so‘z berganmiz. Prezident oldida ham uyatlimiz.
Ishoning, agar shu bolaning hayotini saqlab qolish uchun kerak bo‘lsa, men hech ikkilanmay, o‘z lavozimimdan voz kechardim”, – dedi Bekmurod Abdullayev.
