Kosonda Spark YTHga uchrab, ikki kishi vafot etdi
Holat bo‘yicha viloyat IIB maʼlumot berdi.
Bugun, 19-dekabr kuni Qashqadaryo viloyatining Koson tumanida odam o‘limi bilan bog‘liq yo‘l-transport hodisasi sobir bo‘ldi. Holat bo‘yicha viloyat IIB maʼlumot berdi.
Qayd etilishicha, avtohalokat soat 07:15 larda xalqaro ahamiyatdagi A-380 G‘uzor–Buxoro–Nukus–Beyneu avtomobil yo‘lining 73-kilometrida, Koson tuman “Pudina” QFY hududida yuz bergan. Mirishkor tumani “Zafarobod” MFYda yashagan haydovchi B.N. Spark rusumli avtomashinani Qarshi–Koson yo‘nalishida boshqarib borib, bir yo‘nalishda oldinda harakatlanib ketayotgan, Koson tumani Mudin qishlog‘ida yashovchi M.D. boshqaruvidagi GAZ-53 rusumli avtomobil bilan to‘qnashgan.
YTH oqibatida Spark haydovchisi B.N. olgan og‘ir tan jarohati sabab voqea joyida vafot etgan. Ushbu avtomashina yo‘lovchisi N.S. esa olgan tan jarohatlari bilan shifoxonada vafot etgan.
Holat yuzasidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.
