Qashqadaryoda 23 yoshli kelin o‘zini osib qo‘ygani aytildi
Holatga viloyat prokuraturasi izoh berdi.
Ijtimoiy tarmoqlarda Qashqadaryo viloyatining Kasbi tumanida 23 yoshli ayol o‘zini osib qo‘ygani haqida xabar tarqaldi. Holatga viloyat prokuraturasi rasmiy munosabat bildirdi.
Aniqlanishicha, joriy yilning 18-dekabr kuni Kasbi tumani tibbiyot birlashmasi tomonidan ichki ishlar bo‘limiga “Maymanoq” MFYda yashagan, 1999-yilda tug‘ilgan ayol bo‘yin sohasidan strangulyatsion egat shilinmasi ko‘rinishidagi jarohati bilan vafot etganligi haqida xabar berilgan.
Marhumaning o‘lim sababiga aniqlik kiritish maqsadida tegishli ekspertizalar tayinlangan. Holat bo‘yicha Kasbi tumani prokuraturasi tomonidan tergovga qadar tekshiruv harakati olib borilmoqda.
“Tekshiruvning borishi viloyat prokuraturasi tomonidan nazoratga olingan”, — deyiladi xabarda.
